وحدت نیوز(پشاور)  بزرگ عالم دین علامہ سید حسین الاصغر نے کہا ہے کہ مجلس وحدت مسلمین ملک کی وہ واحد تنظیم ہے جو ملت تشیع کی حقیقی نمائندگی کر رہی ہے، اسی وجہ سے ہم اس کیساتھ بھرپور تعاون کر رہے ہیں اور آئندہ بھی کریں گے۔

 ان خیالات کا اظہار انہوں نے مجلس وحدت مسلمین کے زیراہتمام پشاور میں منعقدہ ’’افکار خمینی (رح)‘‘ کنونشن سے خطاب کرتے ہوئے کیا۔ ان کا کہنا تھا کہ اس وقت ملت تشیع کے حقوق کے لئے ایم ڈبلیو ایم نے قابل تعریف کردار ادا کیا ہے۔ اسی وجہ سے ہم مجلس وحدت مسلمین کے ساتھ تعاون کر رہے ہیں کہ یہ جماعت فعال ہے اور شیعوں کی آواز بھرپور طریقہ سے اٹھا رہی ہے۔

 ان کا کہنا تھا کہ ہم امید کرتے ہیں کہ مجلس وحدت مسلمین مستقبل میں اس سے بڑھ کر اپنا کردار ادا کرے گی۔ اس وقت مجلس وحدت مسلمین کے علاوہ ملک میں کوئی تنظیم نہیں ہے جو شیعوں کی نمائندگی کرسکتی ہو۔ علامہ سید اصغر الحسین نے مزید کہا کہ ہم مجلس وحدت مسلمین کے قائدین سے توقع رکھتے ہیں کہ وہ اس مشن میں آگے ہوں گے اور ہم ان کے پیچھے ہوں گے۔ ہم حالات کا مقابلہ مولا مشکل کشاء کا نام لیکر کرنے کو تیار ہیں۔