وحدت نیوز(کراچی) مجلس وحدت مسلمین صوبہ سندہ کے سیکریٹری جنرل علامہ مقصود علی ڈومکی نے ایک وفد کے ہمراہ پیپلز پارٹی کے رہنما ، صوبائی وزیر میر ہزار خان بجارانی اور صوبائی وزیر سید ناصر حسین شاہ سے الگ الگ ملاقات کی ۔اس موقع پر ایم ڈبلیو ایم کراچی کے رہنما برادر میثم رضا عابدی،سید رضا امام اور برادرتقی ظفر بھی ان کے ہمراہ تھے۔
اس موقع پر گفتگو کرتے ہوئے علامہ مقصود علی ڈومکی نے کہا کہ سندہ بھر میں تکفیری دہشت گردوں کے اڈے لمحہ فکریہ ہے ،شکارپور کو وانا اور وزیر ستان بنانے کی کوشش ہو رہی ہے ۔انہوں نے کہا کہ طویل عرصہ گذر جانے کے باوجود وارثان شہداء سے کیے گئے معاہدے پر عمل در آمد نہیں ہوا۔سندہ حکومت کو چاہیے کہ وہ معاہدے پر عمل در آمد کو یقینی بنائے ۔سانحے کے بعض زخمیوں کو علاج کی آج بھی اشد ضرورت ہے۔ اس موقع پر سندہ کی سیاسی صورتحال اور ملت سے مربوط بعض مسائل پر تبادلہ خیال کیا گیا۔
اس موقع پر گفتگو کرتے ہوئے میر ہزار خان بجارانی نے کہا کہ دہشت گرد معاشرے کے لیے ناسور ہیں جن کا سد باب ضروری ہے۔سندہ گورنمنٹ نے معاہدے پر عمل در آمد کے سلسلے میں جو کمیٹی تشکیل دی ہے وہ معاہدے کے بقیہ نکات کو دیکھ کر ان پر عمل در آمد کرے گی۔اس موقع پر سید ناصر حسین شاہ نے کہا کہ وہ کمشنر لاڑکانہ اور اے آئی جی سے ان مسائل کے حل کے سلسلے میں بات چیت کریں گے۔
