وحدت نیوز(ڈیرہ اسماعیل خان)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے ڈیرہ اسماعیل خان میں مدرسہ شہید اللہ نواز مرتضوی حاجی مورا میں پرنسپل مدرسہ مولانا کرامت علی حیدری اورمولانا اختر عباس یزدانی اور استاد مولانا حافظ قمر سے ملاقات کی۔ انہوں نے مدرسہ کے زیر اہتمام حفظ قرآن کریم کرنے والے طالب علم حافظ کاظم کو ہار پہنا کر مبارکباد پیش کی۔
اس موقع پر گفتگو کرتے ہوئے علامہ مقصود علی ڈومکی نے کہا کہ قرآن کریم سے انس تلاوت و حفظ قرآن بہترین عبادت ہے۔ دینی مدارس اسلام کے قلعے ہیں جہاں ثقلین یعنی قرآن کریم اور اھل بیت علیھم السلام کی تعلیم سے تمسک کا درس ملتا ہے۔ مدارس دینیہ نے علوم قرآن و اھل بیت علیھم السلام کی ترویج و تبلیغ میں قابل فخر خدمات انجام دی ہیں۔ انہوں نے حاجی مورا اور کوٹلہ سیداں میں شہدائے ملت جعفریہ کے مزار پر حاضری دی۔اس موقع پر مجلس وحدت مسلمین ضلع ڈیرہ اسماعیل خان کے رہنما چیئرمین یونین کونسل رمدانی برادر تنویر عباس مہدی، ایم ڈبلیو ایم بلوچستان کے صوبائی صدر علامہ سید ظفر عباس شمسی، آغا سہیل اکبر شیرازی ،برادر نثار کاظمی و دیگر ان کے ہمراہ تھے۔
انہوں نے ڈیرہ اسماعیل خان کے شہداء کو خراج عقیدت پیش کرتے ہوئے کہا کہ ڈیرہ اسماعیل خان کے مومنین نے صبر اور حوصلے کے ساتھ مشکل ترین حالات کا مقابلہ کیا۔ ڈی آئی خان سرزمین شہداء و استقامت ہے۔