وحدت نیوز(مانٹرنگ ڈیسک) حزب اللہ لبنان کے ڈپٹی سیکرٹری جنرل شیخ نعیم قاسم نے تہران میں صحافیوں سے بات چیت کرتے ہوئے کہا ہے کہ شام میں جاری بدامنی اور خانہ جنگی درحقیقت ایک ایسی عالمی جنگ ہے جو امریکہ اور اس کے اتحادیوں نے شام میں برسراقتدار اسلامی مزاحمت کی حامی حکومت کا تختہ الٹ کر اسرائیلی مفادات کی حامی حکومت لانے کیلئے شروع کر رکھی ہے۔ وہ تہران میں "عالمی سطح پر طاقت کے اسٹرکچر میں عالم اسلام کا کردار" کے عنوان سے منعقدہ کانفرنس میں شرکت کے بعد صحافیوں سے بات چیت کر رہے تھے۔
شیخ نعیم قاسم نے شام میں جاری بدامنی سے مقابلہ کرنے کیلئے حزب اللہ لبنان کی مداخلت کے خلاف بعض لبنانی گروہوں کی جانب سے ڈالے جانے والے دباو اور اس کے حقیقی منشاء کے بارے میں پوچھے گئے ایک سوال کے جواب میں کہا: حزب اللہ لبنان بہت محدود حد تک شام میں سرگرم ہے اور اس مداخلت کا مقصد اسلامی مزاحمت کی سپورٹ لائن اور لبنان کی سرحد کے قریب علاقوں کی حفاظت کرنا ہے کیونکہ ممکن ہے یہ علاقے شام میں عالمی استکباری قوتوں کیلئے نئے گڑھ میں تبدیل ہو جائیں۔
حزب اللہ لبنان کے ڈپٹی جنرل سیکرٹری نے کہا کہ شام میں حزب اللہ لبنان کی سرگرمیوں کی مخالفت کرنے والے تمام گروہ درحقیقت شام میں برسراقتدار اسلامی مزاحمت کی حامی حکومت کے مخالفین ہیں لہذا جب ہم شام میں جاری بحران کو سیاسی طریقے سے حل کرنے کی کوشش کرتے ہیں تو انہیں یہ بات پسند نہیں آتی۔ شیخ نعیم قاسم نے کہا کہ شام میں بدامنی سے مقابلہ کرنے پر ہماری مخالفت کرنے والے گروہوں کی مخالفت کوئی اثر نہیں رکھتی کیونکہ وہ امریکہ کے حامی ہیں۔ انہوں نے لبنان میں مغرب نواز ۱۴ مارچ گروپ کی جانب سے اسلامی مزاحمت کو کمزور کرنے کی کوششوں کے بارے میں پوچھے گئے ایک سوال کے جواب میں کہا کہ اس قسم کی کوشش کرنے والے افراد درحقیقت اپنا وقت ضائع کر رہے ہیں اور لبنانی عوام کے مفادات کے تحقق کی راہ میں روڑے اٹکا رہے ہیں۔
شیخ نعیم قاسم نے اسرائیل کی غاصب صہیونیستی رژیم کی جانب سے تازہ ترین جارحانہ اقدامات کے بارے میں پوچھے گئے سوال کے جواب میں کہا کہ اسلامی مزاحمتی فورسز پوری طرح چاک و چوبند ہیں اور ہر قسم کی جارحیت کا منہ توڑ جواب دینے کی بھرپور صلاحیت رکھتی ہیں۔ ہم اسرائیل کی جانب سے لبنان کی سرحدی خلاف ورزیوں کو بین الاقوامی قوانین کے تحت عالمی اداروں میں پیش کریں گے اور ان حکومتوں کو رسوا کریں گے جو یہ دعوی کرتی ہیں کہ اسرائیل جارحانہ اقدامات انجام نہیں دیتا۔ حزب اللہ لبنان کے ڈپٹی جنرل سیکرٹری نے کہا کہ ہم اسرائیل کے جارحانہ اقدامات کا ایسا جواب دیں گے کہ وہ لبنان پر فوجی حملہ کرنے کی جرات نہیں کرے گا۔